Yfirlit fréttaYfirlit frétta

Þorsteinn R. Hermannsson hefur verið ráðinn forstöðumaður samgangna hjá Betri samgöngum ohf. til eins árs frá 1. september. Hans hlutverk verður að vera fyrirtækinu til ráðgjafar um samgöngumál, vinna að undirbúningi verkefna Samgöngusáttmálans og fylgja því eftir að markmið hans um greiðari samgöngur, fjölbreyttir ferðamátar og aukið umferðaröryggi náist í góðu samstarfi við Vegagerðina og sveitarfélögin. Samgöngusáttmálinn var undirritaður af ríkinu og sveitarfélögunum á höfuðborgarsvæðinu árið 2019 og er Betri samgöngum ætlað að hrinda honum í framkvæmd á næstu 13 árum með 120 milljarða króna fjárfestingu í öllum ferðamátum.

Á síðustu mánuðum hafa birst greinar í fjölmiðlum þar sem lagt er til að farið verði í létt hraðvagnakerfi (e. BRT light) í stað þess hágæða hraðvagnakerfis sem er nú í undirbúningi og er kallað Borgarlínan. Hugmyndir um létt hraðvagnakerfi eru ekki nýjar af nálinni. Þetta er einn af þeim valkostum sem var skoðaður í aðdraganda þess að svæðisskipulag höfuðborgarsvæðisins 2015 var sett. Þá var niðurstaðan að létt hraðvagnakerfi myndi ekki ná sama árangri og hágæða hraðvagnakerfi og að samfélagslegur kostnaður yrði mun hærri ef ekki væri farið í hágæða kerfi.

Davíð Þorláksson, framkvæmdastjóri Betri samgangna, var í viðtali við Stefán Einar Stefánsson viðskiptaritstjóra Morgunblaðsins í sjónvarpsþættinum Dagmálum á Mbl.is í dag. Fjallað var um Samgöngusáttmálann, með sérstakri áherslu á Borgarlínuna. Davíð sagði að það yrði alltaf leitað hagkvæmustu leiða til að ná markmiðum Samgöngusáttmálans. Hann benti á að hugmyndir um létta borgarlínu myndu ekki ná sama árangri og sú hágæða Borgarlína sem unnið er að.

Ríkið og sveitarfélögin á höfuðborgarsvæðinu skrifuðu undir Samgöngusmáttmála árið 2019 þar sem ákveðið var að fara í 120 milljarða króna fjárfestingu á 15 ára tímabili í samgönguinnviðum á höfuðborgarsvæðinu. Betri samgöngur ohf. voru stofnaðar í lok ársins 2020 til að hrinda þessum verkefnum í framkvæmd í samstarfi við Vegagerðina og sveitarfélögin og annast fjármögnun þeirra. Betri samgöngur og Vegagerðin hafa nú undirritað rammasamning um framkvæmd þessara verkefna.

Þegar innviðafjárfestingar eru skipulagðar er nauðsynlegt að hugsa til langs tíma. Eins árs gildistími fjárlaga og fjárhagsáætlana sveitarfélaga dugir ekki. Í Noregi hefur verið farin sú leið að opinberir aðilar hafa gert með sér samgöngusáttmála. Fyrsti sáttmálinn var gerður í Björgvin fyrir um 35 árum. Ósló er nú á sínum þriðja sáttmála. Með þeim ná öll, sem þurfa að koma að samgöngumálum, sér saman um framtíðarsýn. Ákveðið er í hverju verði fjárfest og hvenær. Ekki eru teknar u-beygjur eftir kosningar, þótt auðvitað sé nauðsynlegt að endurskoða áætlunina ef aðstæður breytast. Óhætt er að segja að reynslan í Noregi hafi verið góð.

Þröstur Guðmundsson verkfræðingur hefur verið ráðinn forstöðumaður verkefna og áætlana hjá Betri samgöngum ohf.

Frumdrög fyrstu framkvæmdalotu Borgarlínunnar voru kynnt í beinu streymi fyrr í dag. Í frumdrögum eru kynntar fyrstu heildstæðu tillögur að útfærslu borgarlínuframkvæmda, frá Ártúnshöfða að Hamraborg. Kynningunni var streymt beint, meðal annars á facebooksíðu Vegagerðarinnar en við sama tækifæri var opnuð ný og endurbætt vefsíða Borgarlínunnar www.borgarlinan.is.

Davíð Þorláksson, nýráðinn framkvæmdastjóri Betri samgangna, var í viðtali við Sigmund Erni Rúnarsson í sjónvarpsþættinum 21 á Hringbraut í kvöld. Fjallað var um verkefnin framundan með áherslu á fjölbreytni og valfrelsi í samgöngumálum.

Davíð Þorláksson hefur verið ráðinn framkvæmdastjóri Betri samgangna ohf. Vinnvinn ráðningar og ráðgjöf hafði umsjón með ráðningarferlinu.